إوعوا يغركوا إن سكاتي ممات d.Ashraf Abo Zeid

إوعوا يغركوا إن سكاتي ممات
أو دمعتي ضعف وحاجات
أو وقفتي وسط الطابور شحات
أو إن حلمي لأمي مات
أنا زي الجمل بصبر ولو حرنت
يبقي الطغاة أموات
أنا صابر بس أخرة صبري مرار
وأخرة دمعتي سيل
هتقلع نبت الشيطان وتكسر الأسوار
ونفسي واحد دكر يطلع يقول حقي
هكفنه فيها واعمله تذكار
وحالف لمسح دمعتك
واجبلك من حبنا ضي
وإن غبت يامه إعرفي إن الديابه مليه الحي
وإن مت بكره ابني زمانه جي
يغزلك توب الفرح وينور بكره اللي جي