البراءة جمال بخيت

البراءة طهرتني خرجتني للحياة
والطفولة المستحيلة تهت فيها وقلبي تاه
العيون دي م الآيات والشفايف معجزات
والطريق بلاقيكي فيه من بدايته لمنتهاه
***
قلبي حبك مش هداري
ما انتي سكني وانتي داري
وانتي قدري واختياري
وانتي أملي في النجاة
كل يوم بطلب محبة
تسمحيلي حبة حبة
ألقى سري اللي استخبى
جوه حزني وقاللي آه
***
آه لو افتح يوم عيوني
ألقى طيرك فوق غصوني
وألقى حبك لون جنوني
قلبي يهرب من آساه
يا حبيبتي غصب عني
دايما أغرق في التمني
أصلي منك وانتي مني
لو في يوم الحب تاه