نـــونــــو .. شعر : سيد حجاب

شعر : سيد حجاب
_______________

نـــونــــو ..

أد شجــرة الفلفل ..

بنــــت السلطــــان ..

مجعوصه فى طرف الديوان

بتقول ..

( ويا سبحان مين جعل الكلمه فى شفايفها ..

لولى ومرجان ! )

بتقول : عايزاه

أعمى .. بعيون عميان

أطرش .. مخروق لودان

وبنص لسان

( النص اللى مابيقولش الحق ! )

دا الحقانى فى بلدى بتاكله القضبان

ويروح النار .. ويا الغوله والجان

عايزه عريسى يبقى أعمى ..

واطرش ..

واخرس ..

وجبـــان ..

وانا افرفط له حبى .. حب الرمان

.................................

كل اللى كتبته دهه ..اعلان

بأمارة ماهو مكتوب فى ورق

يشبه ورق الجرنال

اقروا ياخرس ــــ

يا طرش ..

ياهبل ..

ياعميان ..

اعلان النونو ..

شجراية الفلفل ..

بنت السلطــان .